Lo Boièr, d’imne catar a estandard new age ?

Nombrosas versions del cant tradicional occitan Lo Boièr cumulan de milions de vistas sus YouTube, sovent en versions electro-ambient, de còps acordadas a 432 hèrses e de còps quitament dins de version de maitas oras -probablament destinadas a la pregària e a la meditacion.

Segon las personas que meton en linha aquelas versions, Lo Boièr es un imne secrèt dels catars.

Una cresença comuna als mitans neocatars e occitanistas prèsta en efièch a aquel cant una significacion secrèta qu’amagariá un messatge de resisténcia cap a l’opression francesa e catolica après la crosada albigesa. Aquò remonta almens al començar del sègle XIV, o mai d’ora encara !

Nos vesètz venir de luènh ? Òc-ben, aquela cresença es infondada e sètz a ne legir un debunk.

Articles serioses que descrivon l’origina de la cançon e del mite que l’entorneja, n’i a dempuèi 1991 al mens. Los podètz retrobar sintetizats sul sit del Cirdoc.

Son origina medievala e catara es en fach una de las nombrosas invencions dels istorians romantics del sègle XIX, iniciada aquí pel pastor ariegés Napoleon Peyrat, autor d’un dels best-sellers sul subjècte : Histoire des Albigeois.

Mas perqué daissar pas las gents somiar?

Seriá pas aquò una cresença sens pròva mas inofensiva coma la perilhositat dels banhs just après lo repais o l’atribucion del Se Canta a Gaston Febus ?

Per la màger part de las personas es probablament lo cas.

Mas per d’autres, aquela cresença es pas isolada : fa sovent partida d’una mitologia a mièg camin entre roman nacional e espiritualitats novèlas e contribuís a entretenir una proximitat del movement occitan ambe’ls movements que se revendican «catars».

L’exemple mai parlant d’aquela convergéncia, son las commemoracions del massacre pel fuòc de mai de 200 personas jutjadas ereticas a Montsegur en 1244.

Aquelas celebracions se fan cada 16 de març, data anniversari del lenhièr e aquel cant i es entonat enmemòria de las victimas.

S’afirmarèm pas que tot çò qu’es neocatar es derivas sectàrias… podèm pas dire tanpòc que i a pas res d’inquietant. I a una preséncia visibla de l’antroposofia, movement espiritual a prepaus del qual la MIVILUDES¹ e l’UNADFI alèrtan regularament lo public. E tanben d’autres movements mens coneguts que qualificarèm pas categoricament de sèctas mas a prepaus dels quals d’unes articles e testimoniatges nos pòdon incitar a la vigilància.

Per conclure sus una nòta mai leugièra, en legissent los articles d’Éliane Gauzit e Marie Claire Viguièr que cita lo bilhet d’Occitanica, aprenèm entre autras causas que nòstre cant tradicional :

• es atestat pel primièr còp al sègle XVIII
• auriá pogut aver un sosentendut sexual
• seriá estat cantat dins las societats republicanas de Lauragués pendent la revolucion francesa
• e auriá servit de cant de dòl pendent la revòlta dels vinhairons de Lengadòc de 1907.

Segur, aprendrèm pas res d’aquò dins las nombrosas versions misticas que fan mèma pas semblant de respectar la prononciacion de nòstra lenga.

L’ istòria vertadièra a pas per sol meriti d’èsser vertat : es al mens autant inspiranta e legitimanta pel nòstre patrimòni cultural que la cresença que l’eclipsa.

Quand los faches son mai polits que la legenda, e s’arrestàvem d’estampar la legenda ?

Playlist de conclusion

Mercés d’aver legit aqueste article en entièr ! Volètz qualques interpretacions sens sintetizadors cheap e amb d’occitan corrèctament prononciat ?

• la version reggae del grop Bilingüe (qui torna a la cançon sa dimension coquina ! Benlèu qu’avián legit los articles ?)

• la version dark folk de Gofannon
• e la version metal del grop Lou Quinse 

---

1 En particular ambe la medecina antroposofica que, segon l’UNADFI, risca d’esluenhar sons adèptes de tractaments eficaces e las escòlas Steiner ont las epidemias de sarrampiu e l’endoctrinament inquietan.